Sigurado eon nga makabaton it P500 pesos nga dugang nga social pension ro mga pigado nga senior citizens makaron nga 2023.
Raya ro ginpasiguro it sangka mamalidha , kun sa siin halin sa P500 pesos hay magiging P1,000 pesos eon ro mabaton it mga senior kada buean ukon P12,000 pesos sa bilog nga dag-on.
Nasayuran nga nagtaeana it P50 billion pesos sa 2023 National Budget agud nga madoble ro pension nga mabaton it haeos 4.1 million indigent senior citizen.
Raya hay base sa Republic Act 11916, kun sa siin nakabaehag sa nasambit nga laye nga pagataw-an it nasambit nga pension ro mga senior nga mahina eon ag masakiton eabi eon ro mga lolo ag lola nga owa it ginabaton nga pension halin sa ibang ahensya it gobyerno ag pribadong kumpanya.
Ro Department of Social Welfare and Development (DSWD) man ro magatau it nasambit nga social pension it mga senior citizens.
Sa pihak it waea-tuo nga pagtaas sa presyo it mga baeak-eon ag dugang nga sukot sa mga serbisyo, anuman nga kantidad hay makabig nga mabahoe nga bulig eabi eon sa mga kababayan naton nga ginakapos.
Ro ginahinyu eang naton sa natungdan, siguraduhon it mga nakakabaton it ayuda nga sanda ro mga nagakabagay.
Padayun nga usisaon ro listahan it mga benepisaryo ag libuton ro mga barangay, eabi eon ro mga maeayo nga lugar agud nga masiguro nga natataw-an it bulig ro mga eubus nga nagakinahangean.
Una eon ro pondo, ro kinahangean eon lang hay maipanupod raya it maayos ag patas.
