KALIBO, Aklan—Ginpasiguro it Municipal Planning and Development Office it lokal nga gobyerno it Kalibo nga indi maapektuhan ro operasyon it andang taeatapan kasunod it pagbaylo it liderato.
Raya hay kasunod it nakataeanang pagpanaog sa pwesto ni Kalibo mayor Emerson Lachica nga pagabuslan ni mayor-elect Juris Sucro.
Suno kay MPDO head Engr. Marlo Villanueva nga nakaplastar eon ro tanan nga mga nakalinyadang proyekto ag programa makaron nga 2022 nga nakabaehag sa andang annual investment plan nga ginbaeay sa idaeum it administrasyong Lachica.
Pila sigon sa andang ginasakuan makaron hay ro pag-update sa mga papeles may kaangtanan sa comprehensive development plan, local development plan ag ro annual investment plan para sa maayos nga transition sa Hunyo.
Nakadepende eon sigon sa masunod nga liderato kon igapadayon ukon indi ro pila sa mga napurnadang proyekto ni outgoing mayor Lachica.
Samtang, ginpamilit pa kara nga maskin sin-o pa man ro magapungko nga alkalde hay magasuporta ag magasunod sanda sa anuman nga desisyon kara, kun sa siin magiging dere-deretso eang ro andang pagtrabaho bilang mga empleyado it munisipyo.
