KALIBO, Aklan—Ginaboebanta nga P70,000 ro danyos sa natabu nga sunog sa library it Aklan National High School of Arts and Trades ukon ANHSAT kaina it aga-aga sa Barangay Andagao, Kalibo.
Suno kay Richard Flores, secondary school principal 1 it nasambit nga eskwelahan nga mabahoe ro anang pagpasaeamat sa mga naka-duty nga gwardiya nga nagbueuligan rason nga insigidang natapna ro kaeayo ag owa eon nagkalhit pa.
Bag-o eamang sigon nga naka-roving ro andang gwardiya kat impormahan it sangka residente nga may naga-asu sa sueod it library.
Mag-eowas sa libro, pila suno kana sa mga nasunog hay ro mga importanteng dokumento it eskwelahan, computer sets, air conditioning unit, mga second hand nga uniform nga gina-donate sa mga estudyante nga owa it pangbakae, ag iba pang kagamitan.
Sa mayad nga swerte sigon ag portion eamang it library ro nasunog ag owa naabot ro ginataguan nanda it pondo it parents-teachers association.
Mabahoe ro andang pagpati nga faulty electrical wiring ro rason it sunog.
Natabu suno kana ro insidente matapos nga maka experiensiya it power interruption.
Sa pihak kara, nagapadayun pa ro imbestigasyon it Bureau of Fire Protection ukon BFP Kalibo sa insidente.
