KALIBO, Aklan — Patay ro rider samtang naninahan ro anang angkas matapos nga bumunggo ro andang ginasakyan nga motorsiklo sa puno it mangga sa Purok 4, Brgy. Navitas, Numancia, Aklan.
Nakilaea ro namatay nga si John Jay Campos, 22, nga nag-angkon it grabeng lastro sa ueo ag iba pang parte it eawas samtang naninahan man ro anang backrider nga si Wilson Torcuator, 25, nga nakaangkon man it bale sa waea nga paa ag nina sa nagkaeain-eain nga parte it eawas, parehong residente it Brgy. Baybay, Makato.
Ro daywa hay gindaea sa Aklan Provincial Hospital, apang ro driver hay gindeklarang dead-on-arrival.
Base sa report, magka-angkas ro daywang biktima sa sangka motorsiklo nga ginamaneho ni Campos, apang bangud nga madasig ro pagpadaeagan sa pakurbada nga karsada hay eumapos sa kurae it panimaeay ni Remedios Talas sa nasambit nga lugar ro mga biktima ag bumunggo sa sangka puno it mangga.
Nasayuran nga halin sa sangka bar sa banwa it Kalibo ro mga biktima kung siin sanda nagpatigayun it pag-inuman.
Ro insidente hay padayun nga gina-imbestigahan it Numancia Police Station.
