KALIBO, AKLAN — Nagapadayon ro ginahimong imbestigasyon it pulisya sa pagpamaril it riding-in-tandem nga ginkamatay it sambilog samtang nanihan ro sambilog nga iba pa sa Brgy. Manocmanoc, Boracay.
Patay eon kat makaabot sa sangka klinika sa isla si Ryan Raymundo, alyas Otoy, 38, residente it Sitio Hagdan, Brgy. Yapak sa isla, samtang naninahan man ro angkas kara nga si Michael Raymundo nga nag-angkon it tama it bala sa tiyan ag maswerteng nakadaeagan ro sambilog pa nandang kaibahan nga si Bernard Raymundo, parehong mag-ingkampod.
Ginapatihan nga ro mismong punterya it suspek nga nakasakay man sa motorsiklo hay si Ryan nga ginasugid nga manghod it sangka pulis nga dating nakataeana sa Anti-Drug Enforcement Task Group it Aklan Police Provincial Office.
Ginharangan sigon ro ginasakyang motorsiklo it mga biktima it riding-in-tandem ag antes nga ginbinaril.
Kat matumba sa motorsiklo hay maeapitang ginbinaril ro mga biktima ag insigidang nagpaeagyo ro mga suspek.
Ginatumod pa it Boracay Tourist Assistance Center (BTAC) ro pagkakilan-ean it mga suspek ag kon ano ro motibo sa krimen.
