TANGALAN, Aklan—Patay ro sangka 22-anyos nga eaeaki samtang ninahan mat-a ro sambilog nga iba pa matapos ro nag-eontad nga komosyon nga nauli sa pagbueon-an sa Brgy. Tamalagon, Tangalan ko Biyernes Santo, Abril 18, 2025.
Sa imbestigasyon it pulisya, ginpahayag ni P/Lt. Noemi Ibuyan, deputy chief of police it Tangalan Municipal Police Station, nauna eon nga gin-adtunan it anang manghod ro suspek kaibahan ro ap-at nga iba pang kaeaeakin-an samtang nagakatueog sa housing unit it National Housing Authority sa Brgy. Pudiot it nasambit nga banwa agud nga magpangayo it kwarta pambakae it aeak.
Apang, nagpamalibad sigon ro suspek nga uwa it maitao nga kwarta sa anang igmanghod rason nga gin-ayat imaw kara it inaway hasta sa nauli sa diskusyon ag pagsapote kana.
Kat nakapanaw eon ro mga raya hay nagdesisyon ro suspek nga idto magkatueog it uman sa anang lola sa Brgy. Tamalagon ag samtang nagabaktas hay nasub-eang nana ro tricycle sakay ro anang igmanghod kaibahan eon ro mga biktima ag iba pang mga kaeaeakin-an.
Dikara eon sigon imaw ginpunduhan, ginlibutan ag ginsalakay kadungan sa pagsapote kana.
Kat nakaangkon imaw it tyansa nga maagaw ro kutsilyo it sambilog sa mga nagasapote kana hay ginbuno nana ro mga biktima nga ro sambilog kanda hay binawian it hueam nga kinabuhi samtang ro sambilog mat-a hay nagapabilin nga naka-confine sa Aklan provincial hospital.
Samtang, ro suspek nga 25-anyos hay una eon sa kustudiya it Tangalan PNP ag posibleng pagapasakaan it nagakaigo nga kaso.
Ro insidente hay padayon pang ginaimbestigahan it pulisya para sa nagakaigong disposisyon.
