KALIBO, Aklan — Patay ro angkas samtang una man sa kritikal nga kondisyon ro driver it sangka motorsiklo matapos banggaan it ambulansiya sa national highway nga sakop it Barangay Linabuan Norte, Kalibo, Aklan.
Ginkilaea ro namatay nga si Marcial Rose, 28, sangka construction worker ag residente it Barangay Linabuan Sur, Banga, Aklan samtang ninahan ro anang katrabahong si Niño Leo dela Rosa, 29, it Barangay Andagao, Kalibo.
Sakay ro daywa it motorsiklo kat banggaan it kasub-eang nga ambulansiya nga ginamaneho ni Joe Marie Machado, 56, it F. Quimpo St. Kalibo.
Gindaea ro daywa sa Aklan Provincial Hospital apang uwa eon nakaabot si Rose bangud sa naangkon kara nga lastro sa ueo.
Sa imbestigasyon it pulisya, madasig sigon ro padaeagan it ambulansiya halin sa siyudad it Iloilo ag kat mag-overtake hay uwa kara nataeopangdan ro anang kasub-eang nga motorsiklo.
Ginapahayag nga uwa it iwag ro motorsiklo ag uwa man it helmet ro daywa.
Una eon sa kustodiya it Kalibo Police Station ro driver it ambulansiya nga ginapanag-iyahan it Aklan Provincial Government.
Nagapadayon pa ro imbestigasyon it pulisya sa nasambitang insidente.
