KALIBO, Aklan — Patay ro sangka eaeaki matapos nga bumangga ro anang ginamaneho nga motorsiklo sa sangka tricycle sa karsadahon nga sakop it Brgy. Caano, Kalibo.
Nakilaea ro rider nga si Ranie Raz, 30, residente it Brgy. Mabilo, New Washington, nga suno sa mga otoridad hay paagto sa banwa it Kalibo halin sa banwa it New Washington.
Sa imbestigasyon it traffic section it Kalibo Police Station pinaagi kay P/Staff Sgt. Jomar Ortega, nagatuhaw nga gulpi sigon nga nag-agto sa pihak nga linya ro motorsiklo nga bumangga it “head on” sa tricycle nga ginamaneho ni Boynoel Malacas, 37, residente it Poblacion, New Washington.
Ro tricycle hay paagto kunta sa Brgy. Polo, New Washington.
Sa kabaskog it pagbangga hay inapok ro rider nga gindeklarang dead on arrival sa ospital. Duda it mga otoridad nga una sa impluwensiya it makahieilong nga ilimnon si Raz samtang nga nagamaneho.
Samtang, padayun man nga gina-obserbahan sa sangka pribadong ospital ro sangka pasahero nga si Flora Mae Malacas, 44, samtang gindaea man sa provincial hospital si Noli Trinidad, 53, bangud sa mga naangkon nanda nga nina.
Nasayuran nga ro tricycle hay may an-um nga pasahero.
Nagkasugot ro magtimbang nga parte nga makaangkon it amicable settlement.
