KALIBO, Aklan—Gindeklarang dead on arrival ro sangka 20-anyos nga motorcycle rider samtang padayun nga confine sa provincial hospital ro daywang iba pang rider, kun sa siin, sa kritikal nga kahimtangan ro sambilog sa mga raya sa pagkarambola it tatlong motorsiklo sa national highway it Brgy. Jumarap, Banga, Aklan.
Nakilaea ro namatay nga si Jan Rey ViVas, residente it nasambit nga barangay samtang ro kritikal hay si Roudin Rebanio, 23-anyos ag residente it Brgy. Linabuan Sur, Banga ag nakaangkon it minor injury si Gilbert Boscano, 25-anyos ag tumandok it Brgy. Tabayon, Banga.
Base sa report, madasig nga nagapadaeagan it anang motorsiklo si Rebanio sa nasambit nga highway kat agawon sigon kara ro pihak nga linya rason nga bumunggo sa kasub-eang nga ginamanehong motorsiklo ni Vivas.
Nadaeahig eamang sa insidente ro sambilog pang rider nga si Boscano.
Insigidang gindaea sa ospital ro tatlo, apang owa eon naka-abot it buhi si Vivas.
Suno kay P/ Staff Sgt. Danilo Dalida Jr. it Banga PNP nga halin sa Linabuan Sur sanday Rebanio kaibahan ro anang angkas nga si Alvin Zabiaga ag Guilbert Boscano, kun sa siin, andang gin hatod ro nobya ni Guilbert sa Brgy. Tabayon.
Natabu ro insidente kat nagapabalik eon sanda sa Linabuan Sur sa sangka kasadyahan kat magkarera sanday Rebanio ag Boscano.
Ro angkas nga si Zabiaga hay gin-refer sa out-patient department matapos nga mabueong.
Gindugang pa ni P/Staff Sgt. Dalida nga ro mga eakot sa aksidente hay parehong owa it helmet, lisensya ag nagakaigong dokumento.
Nagapadayun pa ro imbestigasyon it Banga PNP sa insidente.
