KALIBO, Aklan — Sambilog ro patay samtang ap-at nga iba pa ro naninahan kaibahan ro sangka American national sa pagbanggaan it motorsiklo ag tricycle sa Barangay Bulwang, Numancia, Aklan.
Patay eon kat makaabot sa Aklan Provincial Hospital ro driver it motorsiklo nga si Danilo Yabut, 65, residente it Barangay Navitas, Malinao samtang padayon nga ginabueong ro ninahan nga igmanghod nga si Jossel Yabut, 57, it Barangay Tambuan, Malinao.
Pila pa sa mga gindaea sa ospital hay ro driver it nakabanggaang tricycle nga si Renel Taburnal, 29, it Barangay Dongon West, Numancia ag mga pasaherong magkarelasyon nga sanday Jonathan Michael Jansen, 61, sangka Amerikano ag Jonalyn Contreras, 41, it Barangay Mantiguib, Makato.
Paadto it banwang Kalibo ro magmanghod nga Yabut agud magbakae kunta it bueong, apang pag-abot sa nasambitang lugar hay nabanggaan kara ro tricycle nga paadto kunta it Makato.
Sa imbestigasyon it pulisya, madasig ro daeagan it motorsiklo ag gin-ukopa sigon kara ro linya it tricycle nga nagresulta sa disgrasya.
Nagapangatubang sa kasong reckless imprudence resulting to homicide ag serious physical injury ro driver it tricycle.
