KALIBO, Aklan — Patay eon kat maka-abot sa Aklan Provincial Hospital ro sangka eaeaki nga sakay it sangka naaksidenteng saeakyan sa national highway nga sakop it Brgy. Dumga, Makato, Aklan.
Nakilaea ro biktima nga si Robert Cano, sa legal nga edad ag residente it Damo-ong, Janiuay, Iloilo.
Ro iba pang sakay it saeakyan nga nakaangkon eamang it minor injury hay sanday Alexander Epifanio Canabo, 43, residente man it Damo-ong, Janiuay, Iloilo, driver it Crosswind nga saeakyan; Junie Arenal Eleria, 32, it Eastville, New Buswang, Kalibo; Jay-ar Vercenio Jr., ag Erwin Herera Cano, parehong sa legal nga edad ag mga taga Damo-ong, Janiuay, Iloilo.
Base sa imbestigasyon it Makato PNP, halin sa Caticlan ag pabalik eon kunta sanda sa syudad it Iloilo kat matabu ro aksidente.
Ginasugid nga posibleng nadueaan it kontrol sa pagmaneho ro driver kat mapiyungan rason nga haagto sanda sa outer lane it karsada ag bumunggo sa puno it Indian Mango ag bangud sa kabaskugon it impact tumakilid ro saeakyan sa kilid sa karsada.
Napuruhan ro biktima nga nakapungko sa iping it driver matapos nga maigpit.
Ginpahilway man ro driver nga si Canabo matapos nga nagpaguwa it Affidavit of Non interest to file a case rong ama it namatay nga pasahero nga si Cano, kamana man si Ronald Tambong, igmanghod it tag-ana it motorsiklo nga nadaeahig man sa insidente.
Angot kara, gin-atras eon ro kasong reckless imprudence resulting in homicide ag damage to property sa nasambit nga driver.
Madumduman nga ginkustodiya sa Makato PNP si Canabo bangud sa nasambit nga aksidente.
