Kalibo Aklan ———-Patay ro sambilog sa an-om nga imbolbado sa insidente it pagpamaril ag pagpamuno sa Brgy. Andagao, Kalibo.
Ginkilaea ro namatay nga si Jovany Naral, 42-anyos samtang ro limang iba pa nga naninahan hay ginkilaeang sanday Lindy Rebenito, 37; Jenny Moreno, 56; Jiven Rebenito, 33; Ranny Boy Moreno, 29 ag Reynan Rebenito, 32-anyos.
Sa inisyal nga imbestigasyon it Kalibo PNP, nag-adto si Naral sa compound kon siin naga-inuman ro lima.
Angot kara, naggabot sigon imaw it armas ag ginbaril si Lindy nga nagresulta eon sa kinagamo.
Ginasugid nga ginbuno si Naral kasunod it anang pagpamaril kon siin nakaangkon raya it fatal nga lastro sa tiyan nga gintunaan it anang hinali nga kamatayon.
Ro limang iba pa hay nakaangkon man it nagkaeain-eain nga lastro sa kaeawasan kon siin gilayon man sandang nadaea sa provincial ospital para sa andang nagakaigong pagbueong.
Ro insidente hay padayon pang ginaimbestigahan it Kalibo PNP.
