KALIBO, Aklan — Naaresto eon ro sambilog sa daywang menor de edad nga ginasugid nga nagsueod ag nagpanakaw it kapin sa P42,000 nga cash sa sangka establisimento sa Roxas Avenue, Kalibo .
Suno kay Emma Pastrana, manager it nasambit nga establisimento nga ginatugyan eon nanda sa kapulisan ro pagresolba sa kaso .
Nasayuran nga kapin sa P20,000 eon lang ro narekober nga kantidad sa sambilog sa mga menor de edad nga nagapang-eadron it 14 anyos ag nagatindog nga lider it grupo.
Sa mayad nga swerte sigon hay owa nanda nabuksan ro maisot nga vault nga kon sa siin nakatago ro masobra sa P100,000 nga kita nanda ko nagtaliwan nga mga inadlaw .
Base sa imbestigasyon, nakasueod ro mga menor de edad pinaagi sa pagpaeos sa grills it exhaust fan.
Ginpahayag dugang nga ro nasambit nga mga pamatan-on hay pirme man nanda nga nakikita nga nagatambay sa gin-obra nga payag-payag sa guwa it andang establisimento.
Ginapatihan nga ro mga pamatan-on nga eakot sa panakawan hay sanda man ro responsabli nga nagtakaw sa sangka gasoline station ko nagtaliwan nga buean ag iba pang establisimento sa banwa it Kalibo.
Sa pihak nga parte, ginakabig ni P/Staff Sgt. Eric John de Lemos it theft and robbery section it Kalibo Police Station nga case closed eon ro nasambit nga panakawan.
Sa makaron hay padayun ro andang pagtugis sa sambilog pang kaibahan kara sa pageaum nga mabawi ro katunga it kwarta nga andang gintakaw.//
