Kalibo Aklan ————–Bangud sa kakueangan it ebidensya, ginpahilway ro sambilog sa tatlong suspek nga nadakpan ag nakulong sa brutal nga pagpatay sa 39-anyos nga tricycle driver nga si Wilfredo Peralta Tamayo, Jr.
Suno kay Police Staff Sergeant Felizardo Navarra Jr., imbestigador it Numancia Municipal Police Station nga ginbasura it Aklan Prosecutor’s Office ro kasong murder kontra kay Jay-ar Montallana, 20-anyos, sangka construction worker, tubong Imus, Cavite, apang temporaryong naga-istar sa Brgy. Bulwang, Numancia sa baeay it anang tiya bangud sa kakueangan it ebidensiya ag testigo .
Sa baylo, paga-obrahon eon lang imaw nga state witness sa igapasakang murder case pinaagi sa regular filing kontra sa daywang suspek nga gina-alegar nga nagpangalima sa krimen nga sanday Jomar Palacios, alyas Joker ag Rogie Franco, tubong Barangay Taminla, Pototan, Iloilo , owa it permanenteng address ag puro mga miyembro it katutubong Aeta.
Nakilaea ro mga suspek sa bulig it CCTV footages.
Sa pihak nga parte, aminado si Police Staff Sgt. Navarra nga naging mabudlay ro andang manhunt operation kontra sa daywang mga suspek bangud nga owa ro mga raya masyadong nagabuhay sa sangka lugar ag nagasaylo-saylo sakay it andang natungdan nga motorsiklo.
Gintimbre eon man sigon nanda sa Pototan Police Station ro insidente , kun sa siin natukiban nga si Alyas Joker hay may dating kaso it pagpanakaw sa nasambit nga lugar.
Madumduman nga ro biktimang si Tamayo hay nasapwan it daywang teenager nga duguan ag may mga igo it pagbuno sa nagkaeain-eain nga parte it eawas sa kilid it karsada sa Sitio Looban sa Barangay Camanci Norte bandang alas-7:30 it gabi-i ko Sabado nga adlaw, Nobyembre 27.
