Haeos sambilog sa kada tatlong trabahanteng Pilipino ro naka-eksperyensiya eon it grabeng pagka-gaoy ukon burnout sa trabaho, suno sa pagtuon it Agile Data Solutions Inc.
Base sa survey nga ginpatigayon sa 2,000 Pilipino, 22.05% ro naghambae nga medyo gaoy eon sanda samtang 11.61% ro grabe eon nga naka-eksperyensiya it pagka-gaoy. Sa pihak nga parte, 42.75% ro naghambae nga nagapabilin sanda nga mapagsik, samtang 23.58% ro naghambae nga owa sanda it nababatyagan nga gaoy ukon kapagsik.
Nagtuhaw man sa pagtuon nga 45.99% it mga respondent ro naka-eksperyensiya it pagka-gaoy sa trabaho kon amat samtang 24.57% ro naghambae nga pirme ukon haeos adlaw adlaw nanda raya nga naeksperyensiyahan.
Nagapangunang rason it burnout hay ro kabudlay sa work-life balance, nga ginsundan it manabang sweldo kumpara sa kaabuon it trabaho, sobrang workload ukon hugut nga deadline, bukon it klaru nga direksyon it pagdumaea, kakueangan it pagkilaea ag oportunidad sa career growth, ag problema sa pakikipagrelasyon sa mga katrabaho.
Kaibahan sa mga kaeabanan nga epekto it burnout ro pisikal nga pagka-gaoy, kabudlay sa pagtueog, kawad-an it konsentrasyon, pamatyagan nga kueang ro natatapos nga trabaho, pagkaduea it gana sa trabaho, ag pagiging iritable.
Sa pihak kara, 83.52% it mga nagpasakop sa survey ro naghambae nga nagapabilin sanda nga kuntento sa andang karera, maskin nga 59.58% ro nagapati nga owa nagasueong ro andang career bangud sa kakueangan it kahigayunan nga magsaka ag pauman-uman nga trabaho.
