KALIBO, AKLAN — Nakataeanang mag-abot sa Valentines Day ro sambilog sa limang international cruise ships nga magadungka makaron nga Pebrero sa isla it Boracay.
Suno kay Caticlan jetty port administrator Nieven Maquirang, ro cruise ship nga MV Celebrity Constellation hay maga-abot bandang alas-8:00 it agahon ag magabuhay hasta it alas-5:00 it hapon nga may sakay nga kapin sa 3,100 nga pasahero.
Nakataeanang mag-return visit ro MS Europa II sa Pebrero 15 ag MS Seabourn Sojourn sa Pebrero 25.
Samtang, sa Pebrero 28 hay magadungka sa unang kahigayunan ro MS Crystal Symphony ag ro pagbalik it Seven Seas Voyager.
Ginpahayag ni Maquirang nga kapin sa 7,500 nga mga pasahero ag crew ro sakay it nasambitang mga barko nga ginaeaumang magapabaskog sa cruise tourism sa isla.
Pagataw-an sigon it patas nga seguridad ro mga cruise visitor ag mga delegado it Association of Southeast Asian Nations (ASEAN) nga magapueong sa Boracay sa Pebrero 13 hasta it 21.
