KALIBO, Aklan—Naga-abot sa napueong kilo nga pork imbotido ag 153 packs it chicharon ro ginsunog it Office of the Provincial Veterinarian (OPVET)-Aklan.
Nakumpiska ro mga nasambit nga produkto sa ginpatigayun nga inpeksyon it Bureau of Animal Industry ag Veterinary Quarantine Inspector sa bahin it Caticlan Jetty Port.
Suno kay Dr. Joseph Lachica it OPVET-Aklan nga ko nagtaliwan nga adlaw nakakumpiska man sanda it kapin sa 44 packs it chicharon halin sa Batangas nga nakataeana kunta nga i-deliver sa probinsya it Capiz apang madinaeag-on nga nasakote.
Nakabaehag sigon sa provincial ordinance nga hugut nga ginabawaean ro pagsueod it mga meat products halin sa African Swine Fever (ASF) affected areas ag owa it nagakaigo nga dokumento.
May nagakaigo man suno kana nga penalidad para sa mga madakpan nga mag-eabag kara.
Tuyo sigon it ordinansa nga malikawan ro pagkalhit it mga kontaminadong karne.
Nasayuran nga nagapabilin nga eowas sa paeag it virus nga daea it ASF ro Aklan ag bilog nga Western Visayas.
Angot kara, nagapadayun sigon ro andang paglibot ag pag-monitor sa mga establisyemento para masiguro nga owa it makasueod it meat products halin sa mga lugar nga may outbreak it ASF.
