KALIBO, Aklan – – – Magapangatubang sa kasong administratibo ro napueong mga lokal nga opisyal sa probinsiya it Aklan bangud sa isyu it kapabayaan sa isla it Boracay nga nag-abot sa pag-angkon it problema sa polusyon sa nasambitang isla.
Suno kay Department of Interior and Local Government (DILG) Assistant Secretary for plans and programs Epimaco Densing III, kasong grave neglect of duty ro igadihon sa Ombudsman kontra sa napueong mga opisyal nga ginpamalibaran kara nga tumuron.
Nasayuran nga nag-abot sa 50 illegal pipelines ro nauna eon nga nadiskubrehan nga direktang nagapilak it waste water sa baybayon nga nagtueod kay Pangueong Rodrigo Duterte nga imando ro insigidang rehabilitasyon it isla kasunod it naging bansag nga “cesspool.”
Samtang, nakataeanang magpatigayon it audit sa environmental fees agud mataw-an it kaklaruhan ro isyu it anomalya.
