KALIBO, Aklan—Naga-abot sa 10 nga mga nurses it Bureau of Fire Protection (BFP) ro naka-deploy eon sa Dr. Rafael S. Tumbucon Memorial Hospital agud nga makadugang sa mga healthcare workers nga nagatatap it mga pasyente nga tinamaan it COVID-19.
Suno kay SFO1 Leo Jizmundo, Provincial BFP Chief Operations Officer nga ro nasambit nga mga firefighter nurses hay ginhinyu ni governor florencio miraflores sa regional office it BFP.
Apang antes ro andang deployment hay nagabulig eon sigon ro mga raya sa vaccination roll-out it probinsiya.
Ginklaru pa ni SFO1 Jismundo nga dugang nga 10 pa nga mga nurses ro andang nakataeana nga iga-augment nga ginbo-oe halin sa nagkaeain-eain nga mga fire stations sa probinsiya.
Ro nasambit nga tikang hay sa idaeum it Nurse Deployment Program nga sangka joint undertaking it Department of the Interior and Local Government (DILG), Department of Health (DOH) ag Bureau of Fire Protection agud nga makabulig sa pagresponde sa pandemya.
Nagpaidaeom man sa specialized trainings on emergency response ag kaparte it Emergency Medical Service it BFP ro nasambit nga mga firefighter nurse.
Magaserbisyo sanda sa sueod it tatlong buean kun sa siin posible pang ma-extend depede sa sitwasyon it mga ospital ag sa numero it mga kaso it coronavirus.
Ginpasiguro man it pamunuan it BFP nga indi maapektuhan ro andang operasyon sa pagbawas it andang mga tawuhan.
Mag-eowas kara, ro iba pang mga personnel it BFP hay nagabulig man sa pagbantay sa border control checkpoint.
