KALIBO, Aklan—Naga-abot sa napueo ro quarry operators nga nakabo-oe it permit sa banwa it Banga.
Suno kay Engr. Valentine Teodosio it Aklan Environment and Natural Resources Office ukon AKENRO nga raya hay ginaeakipan it siyam nga commercial sand and gravel ag sambilog ro nagahakot it eapok.
Kaeabanan sa mga quarry sites sa nasambit nga banwa hay makita sa Bacan, Taba-ao, Lapnag, Sigcay ag Cupang.
Ginpahayag ni Engr Teodosio nga maskin ano pa bahahoe ro saeakyan, kapin sa 15 cubic meter eamang ro ginapasugtan nga mahakot it sangka dump truck.
Apang ginapatihan nga kaabuan kara hay overloaded nga ginabiyahe kon aga-aga, kun sa siin owa eon ro mga tawuhan it bantay kalikasan nga naga-monitor kanda.
Gindugang pa kara nga owa sa andang hurisdiksyon ro bantay kalikasan kundi sa idaeum raya it treasurer’s office it gobyerno probinsiyal.
Ginaturo nga ro mga overloaded nga dump truck halin sa mga quarry sites ro rason it pirmeng pagkasamad it provincial road nga sakop it barangay Bacan, Banga.
Sa pihak nga parte, ginsuhestiyon ni Engr. Teodosio nga kinahangean nga may nagakaigo nga drainage system ro gina-contruct nga karsada kamana man nga dapat nga damueon ro semento ag may proper monitoring agud nga malikawan ro overloading.
Naging takaw-aksidente eon ro daeanon sa Barangay, Bacan bangud sa pirmeng pag-repair kara.
