KALIBO, AKLAN — Naga abot sa 10 manugturo it sangka pampublikong eskwelahan ro nabiktima matapos malansi it haeos P5,000 it sangka bading sa discount card scam sa Kalibo, Aklan.
Sa interview ng Bombo Radyo, gin pahayag it sangka 35-anyos nga maestra nga nagpamalibad nga magpabanggit it pangaean, sangka nagpakilaeang James Cortes, residente it Batan, Aklan ag ahente it Elite Travel International ro nag agto sa andang eskwelahan ag nagtanyag it discount card para sa pagpa-book it domestic ag international flight sa bisan siin nga travel agency.
Konektado sigon raya sa Department of Tourism (DoT) ag may go signal it Department of Education ro pag agto kara sa mga eskwelahan agud magtanyag it discount card nga naga balor it P499 nga pwedeng gamitin sa pagpa-book it mga flights nga may 30% discount kamana man sa passport ag visa assistance.
Nasayuran nga bangud sa matam-is nga pagpanghambae hay nabola it suspek ro mga bikima nga magbo-oe it discount card nga may expiration date nga August 2019 ag nakakolekta it kapin sa P5,000 sa madaling oras.
Sa pihak nga parte, nagduda sigon ro mga biktima kat indi eon ma-contact ro gin taong numero it telepono kamana man ro address sigon it andang opisina.
Naga padayun pa ro imbestigasyon it Kalibo PNP station sa nasambitang insidente.
