KALIBO, Aklan—Kapin sa 10 nga sako it modified tambutso it motorsiklo ro ginsamad it mga awtoridad matapos nga pasagasaan sa backhoe sa banwa it Kalibo.
Suno kay Vivian Briones, head it Traffic Transport Management Unit ukon TTMU it LGU-kalibo nga mismong si Kalibo Mayor Emerson Lachica ro nagpasamad sa ginatos nga mga nakahilerang nakumpiskang modified tambutso sa Magsaysay Park sa atubang it Municipal Hall nga ginsaksihan it mga katapo it local media, Kalibo Police Station ag ko iba pang sektor.
Ginpamilit ni Briones nga ro pagkumpiska it open pipe mufflers hay bilang kaparte it ginpabaskog nga kampanya it pulisya ag lokal nga gobyerno kontra sa mga masangag nga tambusto it motorsiklo.
Ginpasiguro man kara nga magapadayun gihapon ro pagkumpiska it pulisya sa mga open pipe nga mufflers it mga motorsiklo base sa ginapatuman nga Municipal Ordinance number 2016-003.
Sa idaeum it nasambit nga ordinansa, ro mga masangag nga tambutso hay kinahangean nga kumpiskahon ag uman nga itakod ro orihinal nga muffler samtang ro mga driver man hay may multang P1,500 pesos sa first offense ag P2,500 pesos sa second offense.
Kaabuan sigon sa mga nagagamit it open pipe modified muffler hay mga motoristang owa it nagakaigo nga papeles nga magbiyahe.
Nasayuran nga maabu nga mga residente ro nagareklamo sa sobrang sangag it mga open pipe it motorsiklo nga nakaka-apekto eon sigon sa andang pagtueog ag ikamayad nga eawas.
