KALIBO, Aklan — Bumuhos ro mga volunteers sa Oplan Broadcastreeing, sangka tree planting project sa Lambingan Beach, Brgy. Pook, Kalibo, Sabado it agahon.
Ro proyekto nga dueueungan nga ginpatigayon sa bilog nga nasyon nga una eon makaron sa ika-waeo nga dag-on hay ginpangunahan it Kapisanan ng mga Brodkaster ng Pilipinas (KBP) ag Department of Environment and Natural Resources Office (DENR).
Sa interview it Bombo Radyo, ginpahayag ni Mr. Apol Zaraspe, KBP-Aklan Chairman nga kinahangean nga maengganyo ro tanan nga amligan ro mga nagatubo nga puno mag-eowas sa pagtanum it puno it kahoy.
Suno kana nga ro proyekto nga ginapatigayon kada dag-on hay nagatuyo makaron nga dag-on nga makatanum it kapin 1,000 seedlings it bakhawan tree nga gin-donar it DENR maeapit sa coastal area sa Lambingan Beach nga natumod it DENR nga planting site sa idaeum it expanded National Greening Program.
Gindugang pa kara nga mataeupangdan makaron ro pagsangkiri it mga tambibidli nga senyales nga bukon eon it mayad ro oxygen level sa palibot bangud sa kakueangan it puno it kahoy.
Mag-eowas sa KBP ag DENR, pila pang organisasyon ro gin-imbitahan sa event nga ginaeakipan it Aklan Police Provincial Office, Kalibo Police Station, Philippine Coast Guard Auxilliary, LGU-kalibo, bikers ag iba pa.
Ro programa hay nag-umpisa bandang alas-8:30 it agahon nga dayun nga ginsundan it tree planting activity.
