Kalibo Aklan ——–Sangka 105-anyos nga lola ro nagpabakuna sa banwa it Altavas bilang kaparte it programa it gobyerno agud nga matapna ro coronavirus disease (COVID-19).
Suno sa lokal nga gobyerno it Altavas, si Brigida Panadero ukon mas kilaea sa tawag nga “Nay Beding” it Barangay Poblacion ro pinakamagueang nga residenteng nagpabakuna ko Hunyo 19.
Bangud nga indi eon haeos makatikang hay gin-agtunan eon lang raya it mga taga Rural Health Unit sa andang baeay agud nga mapatigayon ro pagbakuna it anang unang dose gamit ro AstraZeneca vaccine.
Ro magueang hay gin-alalayan it anang miyembro it pamilya samtang ginapatigayon ro inoculation.
Owa man sigon raya it nabatyagan nga sakit ukon side effects mag-eowas sa tuslok it dagum.
Nasayuran nga daywang pandemya eon ro naagihan ni lola Brigida nga mag-eowas sa COVID- 19 hay naabutan man nana ro Spanish flu ko 1918 nga ko rato nga mga paniempo hay naga edad imaw it daywang dag-on.
Angot kara, ginpadumdum it LGU-Altavas ro importansiya it pagpabakuna agud nga masuk-ean ro deadly virus.
