KALIBO, Aklan— Nakabalik eon sa Chengdu, China ro 11 Chinese tourist nga temporaryong nagpabilin sa sangka hotel nga ginapanag-iyahan it provincial government sa banwa it Kalibo, Aklan.
Ginkumpirma ni Dr. Cornelio Quatchon, Provincial Health Officer II it PHO-Aklan nga pasado alas-2:40 kaina it hapon kat nagbyahe ro ginsakyan nandang eroplano paadto sa nasambitang nasyon.
Una kara, gindaea sa Gov. Corazon L. Cabagnot Tourism and Training Center sa Brgy. Old Buswang, Kalibo ro nasambitang mga dumueoong nga ginakaeakipan it pitong adult ag ap-at nga onga agud obserbahan kon makitaan ro mga raya it sintomas it 2019 Novel-Coronavirus.
Nasayuran nga ro nasambitang mga dumueoong hay naghalin sa Hubei province kon sa siin, ap-at sa mga raya hay may close contact sa pasyente sa Hong Kong nga ginasugid nga infected it coronavirus.
Magabakasyon kunta sanda it sang buean sa Boracay apang uwa eon raya nadayon bangud nga ginpaidaeom sanda sa 14 days incubation period quarantine.
