KALIBO, Aklan — Presenteng gina-obserbahan it Provincial Health Office (PHO)-Aklan ro 11 Chinese tourists bangud sa posibilidad nga exposure it mga raya sa novel coronavirus.
Gindaea ro mga raya sa sangka hotel nga ginapanag-iyahan it gobyerno sa Gov. Corazon L. Cabagnot Tourism and Training Center sa Old Buswang, Kalibo, Aklan para sa ginahimo nga obserbasyon.
Ro nasambitang mga dumueoong hay naghalin sa Hubei province nga ginakaeakipan it pitong adult ag ap-at nga onga.
Suno kay Dr. Cornelio Cuachon, Jr. it PHO-Aklan nga ap-at sa mga raya hay may close contact sa pasyente sa Hong Kong nga ginasugid nga infected it coronavirus.
Magabakasyon kunta sanda it sang buean sa Boracay.
Gilayon nga gin-alerto it Hong Kong authorities ro health officials sa Pilipinas rason nga na-trace ro mga raya sa sangka resort sa isla it Boracay.
Pagkatapos it 14 days incubation period, pagasugtan sandang makabalik sa China, sa bulig it China Embassy in the Philippines, ag inde eon pagpasugtan nga maipadayon ro bakasyon sa isla.
Dugang pa ni Dr. Cuatchon nga ginpakamayad nanda nga daehon sa nasambitang hotel ro mga raya bangud sa peligrong makaangkon it hospital acquired-pneumonia kon daehon sanda sa ospital.
Ro mga turista hay nagbyahe halin sa Hong Kong paadto it Kalibo via Manila ko Enero 22.
Sa pihak kara, ginklaro ni Cuatchon nga uwa pa it kumpirmadong kaso it 2019-nCoV sa Aklan ag sa bilog nga Pilipinas.
