KALIBO, Aklan – Temporaryong ginpapundo ro operasyon it 11 nga establisimentong ginapanag-iyahan sigon it mga Chinese ag Koreans sa isla it Boracay.
Ginpahayag it Boracay Inter-Agency Task Force nga sa andang ginpatigayon nga inspeksyon, pila sa mga raya hay nakitaan it kakueangan it mga permits.
Kaibahan sa mga nag-eabag nga establisimento hay ro Bellas Bar and Restaurant, Great Wall Inn and Restaurant, Old Captain Cuisine, Ken MiniMart, Island Staff Restaurant, Ken Street, Coco Spa, Kim Ji Man, W Hostel Boracay Dragon, VIP Souvenir Shop ag YH World Network Services, Inc.
Nauna eon nga ginpahayag ni Malay Mayor Abram Sualog nga kinahangean nga may ginabuytan nga nagakaigo nga lisensiya ag permits ro mga Chinese ag Korean establishments kamana man nga mausisa ro employment status it andang mga foreign workers.
Gin-insister it Department of Interior and Local Government (DILG) nga magabilog sanda it sangka ad hoc committee nga maga-imbestiga sa medyu amamakoe nga pagsoeputan it mga Chinese establishments sa isla nga ginaeakipan it mga representante halin sa LGU-Malay, Department of Labor and Employment, Department of Justice, Department of Trade and Industry ag Boracay Inter-Agency Task Force.
