KALIBO, Aklan—Kapin sa 11 ka panimaeay ro natigayon nga naugdaw matapos ro nag-eontad nga sunog sa Sitio Sinagpa, Brgy. Balabag sa isla it Boracay bandang alas-12:30 kaina it aga-aga.
Suno kay FO3 Jun Lamirez it Bureau of Fire Protection (BFP) Boracay, mabukid ro nasambit nga lugar kon sa siin ro nasambit nga mga panimaeay hay ginapanag-iyahan it pamilya Sastre ag Malbas rason nga naging malisod para kanda ro pagpenetrate sa lugar.
Madasig nga gin-eamon it mabahoe nga keayo ro lugar kon sa siin napueong ka baeay ro nailistang totally damage ag sambilog ro partially damage nga kaeabanan hay human sa mix materials.
Ginpahayag dugang ni Lamirez nga uwa it tawo ro ibang panimaeay kat natabo ro sunog ag ginkinahang-ean pa nga mano-manuhon ro pagbutang it tubi sa fire truck it BFP agud nga maibuga sa nagadaba-daba nga kaeayo.
Ro insidente suno kay Lamirez hay padayon pang ginaimbestigahan it andang taeatapan agud nga matumod kon anu ro gintunaan it sunog.
