KALIBO, Aklan — Nagapangatubang sa kasong rape ro sangka 55-anyos nga fish vendor bangud sa gina-alegar nga pagpanghimueos kara sa 12-anyos nga unga nga presenteng nabdos sa sangka barangay sa banwa it Malinao.
Ginahueat pa makaron it pulisya ro warrant of arrest agud nga maaresto ro owa anay ginpangaeanan nga suspek.
Nagatuhaw sa imbestigasyon nga gin-abangan it suspek ro biktima ko mga buean it Abril bandang alas-7:00 it gabi-i kat nagapa-uli eon raya halin sa sangka baraka matapos nga ginsugo it anang ina nga magbakae it mantika.
Gindaea sigon raya sa kasagingan sa kilid it karsada nga maeapit eamang sa andang baeay.
Matapos ro pagpanghimueos, ginpaandaman it suspek ro unga nga indi magsugid sa anang ina antes imaw nga ginpa-uli.
Hasta nga ko nagtaliwan nga mga inadlaw hay nataeupangdan it manugturo it unga nga nagabahoe ro tiyan it biktima rason nga gin-istorya nana raya ag dikara eon nagsugid ro unga nga ginhimuslan imaw it andang kaeapitbaeay.
Bangud kara, insigidang nagsugid ro manugturo ag ina it unga sa pulisya.
Ro biktima hay ap-at nga buean eon nga nabdos makaron matapos ro insidente it pagpanghimueos kana, kun sa siin, nagapangayo it hustisya ro anang pamilya.
