Kalibo Aklan ——–Masobra sa 122 nga turista nga nagpameke it RT-PCR test results ro gindeklara bilang persona non-grata sa Isla it Boracay.
Base sa resolution nga ginpaguwa it Sangguniang Bayan it Malay nga may petsang Marso 11, 2021, unwelcome sa Isla ro mga nadakpan nga turista samtang ginapatuman ro public health emergency sa nasyon daea it coronavirus disease 2019 (COVID-19).
Sa virtual press conference, ginpahayag ni Tourism Secretary Bernadette R. Puyat nagabueuligan makaron ro natungdan nga ahensiya it gobyerno agud nga mapasabat ro mga turista ag mga indibidwal nga una sa likod it pagpameke it COVID-19 results nga peligroso sigon sa ikamayad nga eawas ag kabuhi it iba pang mga turista, trabahador it tourism sector ag mga residente it Isla.
Madumduman nga ginmanduan eon it Department of Justice (DOJ) ro National Bureau of Investigation (NBI) nga magpatigayon it imbestigasyon ag kasuhan ro mga nagapakalhit it pekeng RT-PCR test results agud nga magamit it mga turista sa andang pagsueod sa Boracay.
Suno sa lokal nga gobyerno it Malay, naga abot eon sa 30 turista ro kinasuhan it Falsification of Public Documents bangud sa paggamit it pekeng negatibong RT-PCR test results.
Hasta ko Abril 26, 2021, ginpahayag it Provincial Inter-Agency Task Force, kapin sa 166 eon ro mga turistang nadakpan nga nagagamit it pekeng swab test results, kun sa siin kaabuan kara hay nadakpan sa Caticlan jetty port.
