Nagaabot sa 1,297 passenger buses sa bilog nga nasyon ro gintaw-an it special permits it Land Transportation Franchising and Regulatory Board (LTFRB) agud makapag-operate makaron nga Holy Week.
Suno kay LTFRB Chairperson Vigor Mendoza II, tuyo kara nga masigurong may bastanteng saeakyan para sa ginaeauman nga pagdagsa it mga pasahero samtang maabong Pilipino ro nagauli sa probinsya para sa dag-unan nga pagpamaeandong.
Gin-insister it LTFRB, normal ro pag-abo it pasahero sa kada raya nga tyempo bangud nga kaparte raya it sangka importanteng relihiyosong tradisyon sa nasyon.
Ginaeauman man it ahensya nga mas magaabo pa ro magasakay sa pampublikong transportasyon bangud sa padayon nga pagtaas it presyo it gasolina, nga nagaduso sa iba nga aywanan ro pribadong saeakyan.
Ginmanduan man it LTFRB ro mga regional director nga siguraduhong maayos ag eowas ro mga bus terminals, kaibahan ro inspeksyon sa roadworthiness it mga saeakyan ag kondisyon it mga driver.
Ginpunto it ahensya nga importante ro kaeowasan ag kasoehayan it mga pasahero ag nagpaandam raya kontra sa mga terminal ag operator nga magaeabag sa mga sueondanan.
