NABAS, Aklan—Positibong ginkumpirma it Nabas Municipal Police Station nga ro 17-anyos nga chatmate ag ulihing kaibahan it 13-anyos nga dalagita ro may kahimuan sa paghimueos ag pagpatay kana nga nasapwan eon lang ro anang bangkay sa kilid it sapa ko Enero 17, 2025 sa Barangay Unidos sa banwa it Nabas.
Suno kay PMaj. Jose Mark Anthony Gesulga, hepe it Nabas PNP Station nga ginpasakaan eon it kasong Rape with Homecide ro suspek apang uwa pa nanda raya ginhold bangud sa ginahueat pa nanda ro igapaguwa nga warrant of arrest it korte.
Ginpahayag dugang ni PMaj. Gesulga nga masobra sa napueong katawo ro nagtestigo kontra sa suspek rason nga napabaskog ro kaso kontra kana.
Sa pihak kara, padayon nga nagaapela ro pulisya sa mga indibidwal nga may dugang nga kasayuran sa insidente nga magdangop eamang sa andang taeatapan agud nga daeayon na maconvict ro suspek nga maga-edad eon it 18-anyos makaron nga dag-on.
Madumduman nga nasapwan ro biktima nga nakahapa sa kilid it sapa nga may mabahoe nga nina sa ueo nga medyu gin eampusan it bato, mga gaob sa nagkaeain-eain nga parte it eawas ag owa it suksok nga pang ubos nga ko ulihi hay nadiskubrehan nga may laceration nga positibong ginhimuslan antes nga ginpatay.
