KALIBO, Aklan—Ginpaidaeum eon sa inquest proceedings ro 13 tanan nga mga sabungero nga nadakpan nga nagapatigayon it iligal nga pagbueang kahapon it hapon sa sangka lugar maeapit sa katangkehan sa Brgy. Caano, Kalibo.
Nagapangatubang sanda sa kasong pag-eabag sa Presidential Decree 1602 angot sa Illegal Cockfighting.
Kapin sa P21,000 sa kada isaea ro gintaeana nga piyansa it korte para sa andang temporaryong kahilwayan.
Nakilaea ro mga ginkasuhan nga sanday Rajah Nolinie, 31-anyos; Rolly Dela Cruz, 59 anyos; Juvel Galopo, 28 anyos; Mark Judie Galopo, 29 anyos; Deo Cipriano, 30 anyos; Andrew Daroy, 39 anyos; ag Ace John Andrade, 18 anyos; ag Ramen Malbas, 31 anyos puro mga residente it Brgy. Caano, Kalibo; Jover Berte, 28 anyos it Brgy. Mabilo, Kalibo kamana man sanday Rolando Regalado, 48 anyos; James Vincent Gonzales, 20 anyos; Reynaldo Estenor, 37 anyos ; ag Joseph Lura, 36 anyos, puro mga residente it Brgy. Pook, Kalibo.
Nasayuran nga pila sa mga raya hay nag-eueumpat sa katangkehan rason nga basa nga ginbitbit paagto sa Police Station.
Naga-abot sa 9 nga pangbueang nga manok ro nakumpiska kun sa siin 3 ro patay ag 6 ro buhi.
Narekober dugang sa lugar ro pilang gamit nga pangbueang ag pilang cash nga nagabalor it P2,350 nga ginapatihan nga taya.
Pilang sabungero man ro maswerteng nakapaeagiw kat mataeupangdan ro nagapa-abot nga operatiba.
