KALIBO, Aklan — Ginatutukan makaron it Malay Police Station ro mga tikang agud nga maprotektahan ro mga residente ag turista kontra sa mga petty crimes sa tunga it padayun nga pagbuhos it mga turista sa isla it Boracay.
Suno kay P/Capt. Dexter Brigido, OIC chief of police it Malay PNP nga indi malikawan ro mga nagakatabu nga street crimes eakip ro panakawan, pickpocketing ag pagsueod sa mga hotels eabi eon kon nagahilapit ro holiday season, kun sa siin, kaeabanan sa mga ginabiktima hay ro mga dumueuong mga nga turista.
Ginpahayag dugang nga gusto nanda nga mapabilin ro peace and order sa isla agud nga maabu pang mga turista ro magabakasyon ag maga-enjoy sa andang pagbisita .
Sa makaron suno kana hay kapin sa 13 nga mga police assistance desk ro andang ginbutang sa beachfront para sa hugut nga seguridad .
Kamana man nga nagapatuman it full deployment it mga kapulisan.
Mag-eowas kara, padayun man nanda nga ginatutukan ro pagsueod it iligal nga droga sa Boracay nga kaeabanan nga nagahalin sa mga kaiping nga probinsiya sa Isla it Panay .
Natigayon sigon nga napapasueod ro mga illegal drugs sa Boracay bangud nga mag-eowas sa kawad-an it k-9 units hay mga maisot nga sachet ro ginadaea it mga pusher agud nga indi mahalata sa andang mga bagahe.
Hugut man sigon nanda nga ginabantayan ro reclamation area sa Caticlan, Malay bangud nga dikara kaeabanan nga naga-agi ro mga iligalista.
