KALIBO, Aklan–Nakataeana nga magtao it serbisyo ro Land Transportation Franchising and Regulatory Board (LTFRB)-6 sa mga driver/operator sa probinsya it Aklan nga owa nakabaton it fuel subsidy sa adlaw it Dominggo, Abril 10.
Suno kay Mr. Edgar Igcasenza, Chairman it Malinao-Lezo Transport Cooperative, ginakalipay nanda ro nasambit nga inisyatiba kasunod it andang pagpanikasog nga mataw-an it subsidya ro tanan nga una sa transport sector.
Suno kana, naga-abot sa 136 nga mga driver/operator ro nakataeana nga magbaton it subsidy card.
Kinahang-ean eamang sigon it mga franchise holder nga magpakita it xerox copy it andang OR-CR, valid ID ag 1×1 nga litrato sa pag-claim it ayuda.
Nasayuran nga kaeabanan nga may pilang ka mga miyembro it transport group nga owa nakabaton it fuel subsidy tuga it technical problem sa PPP card.
