Kalibo Aklan ——Ginpadumdum it Department of Labor and Employment (DOLE-Aklan)ro tanan nga mga kompaniya sa probinsiya it Aklan nga dapat nga maitau ro 13th month pay it andang mga empleyado antes ro Disyembre 24.
Suno kay DOLE-Aklan Provincial Director Carmela Abelar nga pwede eon nga makabaton ro mga empleyado it 13th month pay nga nakatrabaho sa sueod it sang buean base sa Presidential Decree 851.
Ginpaathag kara nga ro kabilugan nga basic salary nga ginabaton sa sueod it anang gintrabahuhan hay iga-divide sa 12 months.
Ginklaru pa kara nga ro mga nag-retiro ag nag-resign nga mga empleyado hay pwede pa nga maka-avail it andang 13th month pay.
Angot kara, gin engganyo ni Abelar ro tanan nga may reklamo sa andang 13th month pay nga magpaeapit sa andang taeatapan agud nga mapatawag ro kompaniya nga natungdan.
Epektibo Disyembre 7 suno kana hay pormal eon nanda nga ginsuspinde ro andang routine inspection agud nga indi mamalisyahan .
Sa pihak nga parte, ro Christmas bonuses suno kana hay owa nakabaehag sa laye ag raya hay nakadepende sa employer.
