KALIBO, Aklan—Ginalamayan eon ro 14-anyos nga binatilyo sa andang baeay sa Barangay Pagsanjan, Banga matapos nga marekober ro anang bangkay bandang alas-2:30 it aga-aga sa baybayon nga sakop it Barangay Dumatad, Tangalan.
Raya ro ginkumpirma ni P/Executive Master Sgt. Esmael Panganonong, focal person it Tangalan Municipal Police Station.
Madumduman nga ro biktimang si Rey Morales hay naeomos ko domingo nga adlaw matapos nga mag-excursion ro andang pamilya sa nasambit nga lugar.
Nakita ro anang eawas sa ginpatigayon nga search and retrieval operation it mga awtoridad may 200 meters ro kaeayuon halin sa natabuan it insidente ag maeapit sa community center kamana man sa PCG sub-station.
Posible sigon nga uwa nakabutwa ro biktima kat hampakon it mabaskog nga humbak ag natabuan pa nga taob rason nga madaeom ro tubi maskin sa binit it baybay.
Sa pihak nga parte, grabe ro kasubo nga nabatyagan it pamilya morales sa trahedya nga natabu.
Suno kay May morales, magueang it biktima nga nanugon imaw sa pagkamatay it anang igmanghud sa batang edad.
Maabu pa sigon raya nga plano nga indi eon makaron mataw-an it katumanan kaibahan ro anang handum nga maging teacher sa ulihi nga mga inadlaw.
