KALIBO, Aklan — Nagapadayun ro imbestigasyon it Banga Police Station sa pagpatay sa sangka 14 anyos nga dalagita nga nasapwan nga nagakaagnas eon nga bangkay sa may kagamuhan maeapit sa eanas nga sakop it Brgy. Pagsanghan, Banga, Aklan.
Nakilaea ro biktima nga si Linna Natabio, grade 7 student, ag residente it nasambitang lugar.
Suno sa ama it biktima, ko adlaw it Sabado pa naduea ro anang onga nga ginaeauman nga sa computeran eamang nag-adto apang hasta ko Domingo hay uwa raya naka-uli.
Base sa report, nagpanaw ro dalagita bandang alas-5:00 it hapon ko nasambit nga adlaw nga owa nag-eaong sa anang mga ginikanan.
Aminado ro ama nga uwa nanda pag-usuya ro dalagita kat uwa raya nakauli it sang gabi-e sa pagpati nga nagtan-aw raya it basketball sa nasambit nga lugar.
Kabi-e eamang sanda nagpursige nga mag-usoy sa andang lugar ag uwa man sanda nagreport sa taeatapan it pulisya.
Ginpahayag dugang nga nakibot eamang ro andang bilog nga pamilya kat may nagpasayod kanda kahapon nga nakit-an ro bangkay it andang onga nga gina-agindan eon sa nasambit nga lugar.
Sa pihak nga parte, suno sa tiya it biktima, permi raya nga nagawinarang apang naga-uli man dayun.
Ulihi nga nakit-an nga buhi ro biktima nga nagbakae sa baraka nga naga-isaeahanon.
Makaron eamang nga uwa raya nakauli it pilang adlaw hasta nga nadiskubrehan nga uwa eon raya it kabuhi sa nasambitang lugar.
