KALIBO, Aklan —Gin paidaeum eonman sa state of calamity ro 14 nga barangay sa Malay, Aklan bangud sa epekto it gina patuman nga an-um nga bueang pagpasara sa isla it Boracay agud taw-an it daean ro paglimpiyo ag rehabilitasyon it inter-agency task force.
Ro deklarasyon hay base sa endorsement maghalin sa Municipal Disaster Risk Reduction and Management Office (MDRRMO)-Malay ag resolusyon it Liga ng mga Barangay.
Nauna eon nga gin deklara ni Pangueong Rodrigo Duterte ro state of calamity sa tatlong barangay sa isla nga gina eakipan it Yapak, Manocmanoc ag Balabag sa kasagsagan it gina patigayung rehabilitasyon.
Maabong mga residente sa mainland ro nawad-an it pangabuhian sa Boracay closure nga kaabuan sa mga raya hay nagatrabaho bilang boatmen, vendors, masahista, tricycle drivers, tour guides ag mga commissioner.
