Nakauli eon sa Pilipinas ro 14 nga Filipino seafarers halin sa United Arab Emirates matapos ro pag-atake sa oil tanker nga MV SIDR sa Strait of Hormuz, suno sa Department of Migrant Workers (DMW).
Nag-abot eon ro mga seafarer sa Ninoy Aquino International Airport Terminal 3 bandang alas-10 it gabi-i it Martes sakay it Emirates flight EK334. Eowas ag sa maayos nga kondisyon ro tanan nga 14 nga seafarers ag nakabaton man sanda it bulig pinansyal ag medikal halin sa DMW ag Overseas Workers Welfare Administration (OWWA).
Madumduman nga tinamaan it mga owa pa nakilaeang projectile ro MV SIDR ko Agosto 31, nga ginkamatay it daywang Filipino seafarers. Padayun man ro proseso it pagpauli sa bangkay it daywang namatay, sa koordinasyon it Philippine Embassy sa Oman ag Migrant Workers Office sa Dubai.
Samtang, gina-imbestigahan it DMW kun nagsunod sa mga regulasyon sa deployment it mga Filipino worker ro tag-ana ag manning agency it barko, kaibahan ro pag-usisa sa eowas nga paglalayag, paglikaw sa high-risk areas, risk assessment ag mga tikang para sa seguridad it mga seafarer.
