KALIBO, Aklan —Gina planuhan makaron it Sangguniang Bayan it Malay nga ipaidaeum eonman sa state of calamity ro 14 nga barangay sa mainland bangud sa epekto it temporaryong pagpasara sa isla it Boracay.
Sa gin patigayung session, gin proponer ni SB member Julita Aron ro tikang bangud maabong mga residente sa mainland Malay ro naduea-an it pangabuhian eabi pa ag naga hilapit eon ro pagbukas it klase.
Suportado sigon ni Mayor Ceciron Cawaling ro pagdeklara it state of calamity sa mga barangay it Sambiray, Caticlan, Cubay Sur, Poblacion, Cogon, Argao, Nabaoy, Cubay Norte, Balusbus, Motag, Cabulihan, Napaan, Naasog ag Dumlog.
Ku nagtaliwan nga buean, gin paidaeum ni Pangueong Rodrigo Duterte ro tatlong barangay sa isla it Boracay nga gina eakipan it Yapak, Manocmanoc ag Balabag sa state of calamity sa gahum it Proclamation No. 474.
Sa pihak nga parte, gina duso it mga konsehal nga bisan sang adlaw hay pasugtan ro mga residente it Malay ag Boracay nga makisadya sa kapiyestahan it San Juan de Bautista sa Hunyo 24 pinaagi sa tradisyunal nga pagpaligos sa baybayon.
Apang, nakadepende sigon raya sa inter-agency task force nga naga dumaea sa gina himong paglimpiyo ag rehabilitasyon sa isla.
Sa makaron hay gina pasugtan eamang ro mga residente it Boracay nga maligos sa gin taeanang swimming area maeapit sa Willy’s Rock sa Station 1 sa sueod it an-um nga buean umpisa ku Abril 26.
