KALIBO, Aklan—Nag-abot eon sa 6,155 ro kabilugan nga kaso it Coronavirus Disease 2019 ukon COVID-19 sa probinsya it Aklan umpisa nga magtuhaw ro pandemya.
Base sa datus nga ginpagguwa it Provincial Health Office (PHO)-Aklan, nakalista sanda it 147 nga mga bag-ong kaso it sakit.
Kun siin, raya hay ginakaeakipan it 36 nga bag-ong kaso halin sa banwa it Banga, 26 sa Kalibo, 24 sa Nabas, 23 sa Ibajay, 11 sa Numancia, waeo sa Buruanga, pito sa Malinao, lima sa New Washington, tig daywang kaso sa Batan ag Libacao samtang tig sambilog sa Balete, Lezo ag Makato.
Sa pihak kara, kapin sa 118 man ro nadugang sa numero it mga nagmayad rason nga sumaka eon sa 4,884 ro total recoveries.
Samtang, may sambilog man nga bag-ong namatay rason nga nag-abot eon sa 133 ro COVID-19 related deaths sa probinsya.
Sa makaron, 1,138 pa ro nabilin nga aktibong kaso nga ginakaeakipan it 967 nga naka-facility quarantine, 81 nga naka-home quarantine ag 90 nga admitted sa COVID ward it Aklan Provincial Hospital.
