BANGA, Aklan—Padayun ro pag-usoy sa sangka 15-anyos nga binatilyo nga ginadudahan nga naeumos samtang nagapaligos sa Aklan river, bandang ala-1:00 it hapon it Miyerkules, Enero 29 sa Brgy. Polo, Banga.
Suno kay MJ Jizmundo it Provincial Disaster Risk Reduction and Management Office ukon PDRRMO-Aklan nga kabulig nanda sa pagpatigayon it Search, Rescue and Recovery ukon SRR operation ro mga tawuhan it MDRRMO-Banga ag Philippine Coast Guard sub-station kalibo agud nga mausoy ro biktimang si Joross Flores, grade 10 student it Bacan National High School ag residente it Brgy. Mambog sa nasambit nga banwa.
Naging sabeag suno kana sa andang operasyon ro maeubog ag masueog nga tubi sa suba eabi eon ro pagpatigayon kunta nanda it diving operation sa pagpati nga hanang-it raya sa mga euka sa lugar nga gin-eumsan it biktima.
Activated eon man suno kana ro search and rescue team it MDRRMO Kalibo, Lezo, Malinao ag Numancia sa posibilidad nga inanud ro eawas it biktima.
Sa pihak nga parte, ginsaysay ni Mary Ann Relojo, tiya it biktima nga posible suno kana nga matapos nga mag-praktis it “dula-dulaan” sa eskwelahan hay nagsaeampitan sanda nga magkaklase nga magpaligos sa suba.
Nagtabok ro mga raya sa pihak nga pangpang ag sa andang pagbalik hay gulping nagtaas ro tubi .
Naeumos sigon ro sambilog sa andang kaklase ag gin-eowas it biktima apang sa owa it swerte hay imaw ro owa naka-kapyot sa butong nga ginhaboy kanda ag eubusan nga inanud it mabaskog nga sueog .
Dugang pa it anang tiya nga indi maka-intigo nga mag-eangoy ro anang gumankon .
Grabe suno kana ro kasubo it mga ginikanan ni joross bangud nga mag-eowas nga mabuot nga unga hay masaligan raya sa mga oeobrahon sa sueod it baeay.
Samtang, handum sigon it ina it biktima nga makita maskin ro eawas eon lang it anang unga.
