KALIBO, Aklan–Nagapanangison nga nagdangop sa Bombo Radyo ro sangka 15 anyos nga dalagita maghalin sa banwa it Buruanga agud nga magpangyo it bulig nga mataw-an it aksiyon ro gina-alegar nga pag-kidnapp ag pagpanghimueos kana it sangka 19 anyos nga soltero ko petsa 15 it Abril sa Pandan Antique.
Suno kay Alyas ‘Nene’ nga antes natabo ro insedente hay nagsaeampitanan sigon sanda nga mga magbarkada nga mag-adto sa Bungan-Bungan sa Brgy. Nipa.
Ginsueang sigon imaw it nobyo it anang best friend kaibahan ro tatlong iba ag nagsakay sanda sa daywang ka mga motor.
Pag-abot sa lugar, hay nag-inuman sanda it anang mga barkada ag dikato man kat nakilaea nana si certain ‘Niel’.
Kat ginahatod eun kungta imaw pauli hay gulpi eamang sigon imaw nga nakabatyag it kakoeba rason nga nagpanaog imaw it motorsiklo ag nagsakay it uman pabalik sa anang mga barkada.
Hasta nga nagsaeampitan ro magbarkada nga idto eun lang sanda tanan matueog sa baeay nanday ‘Niel’.
Pag-abot sa nasambitan nga baeay, ginpahukas sigon kana ro anang aritos ag ginhambaean ni Niel nga magpakuno-kuno nga tomboy ag kung may magpangutana it anang edad hay isugid eamang nga imaw hay 19 anyos eun.
Ko ulihi hay nag chat sigon ro tiya it biktma sa anang sambilog nga barkada rason agud nga nag-eaong imaw nga mauli eun.
Apang imbes nga ihatod sigon imaw ni Niel sa baeay it anang tiya hay gindaea imaw sa baeay it anang classmate nga owa it katawo-tawo kungdi sanda eamang nga daywa ag ro classmate ni Niel nga ko rato nga tiyempo hay may ginpanawan pa.
Suno sa biktima, nakatueogan sigon imaw hasta nga napan-uhan eamang nana nga may nagapuko eun sa anang daywang ka mga alima ag nakapatong eun sa anang eawas suspek hasta nga nabatyagan nana ro pagpanaeakit sa anang pus-on.
Apang bangud nga mabuyog sigon ro anang ueo tuga it kahilungon hay owa nana nahimo pa nga makasukoe.
Sa anang pagbugtaw sa agahon hay owa eun man sigon imaw it eambong ag nakaputos eamang it haboe ro anang eawas samtang nakaiping kana ro suspek.
Dugang pa kara nga gindaea man imaw it suspek sa Pandan ag idto natabo ro ikaywang paghimueos kana.
Gakatueog sigon imaw kat ginpilit it suspek nga makipaghieawas.
Sa pihak nga parte, dismayado man ro pamilya it biktima sa naging tikang it Libertad Police Station angot sa andang reklamo.
Suno kay ‘Tatay doy’, tiyo it biktima nga bukon sanda it kumbinsidosa kung paalin ginbatun it mga otoridad ro andang reklamo.
Dugang pa kara nga maskin ro blotter report hay owa nanda nabasa ag owa man sanda gintaw-an it kopya.
Bangud kara hay nagpanawagan sanda sa mga otoridad nga kungta hay himuon ro tanan agud nga mataw-an it mas madasig nga hustisya ro natabo sa biktima.
