KALIBO, Aklan — Excited eon ro 15-anyos nga dalagitang naga pamasura sa nakataeanang pagsabak sa Street Child World Cup nga pagahiwaton sa Marso 19 hasta 27, 2018 sa Moscow, Russia.
Ro dalagitang soccer player nga si Anabelle Gallano, naga estar sa squatters area it C. Laserna St. Kalibo, Aklan hay magiging kaparte it Philippine team nga magasabak sa nasambitang event.
Ro football tournament nga naga bulig sa mga pakalat-kalat nga unga sa kalye hay bilang kaparte it mga aktibidades it FIFA World Cup 2018 nga pagahiwaton sa Russia.
Si Gallano hay gina sugid nga naga hampang-hampang eamang ku una it soccer nga gina organisa it Sakiros Football Club sa Kalibo Pastrana Park apisar nga nakasuksok eamang raya it tsinelas.
Apang, aktibo rayang naga pasakop sa mga libreng sports training program it LGU-Kalibo eabi eon sa hampang nga football hasta sa nahasa it husto.
Napili si Gallano bangud sa anang gina angkong talento ag potensyal.
Ro dalagita hay naghalin sa sangka kubos nga pamilya nga naga estar sa nasambitang squatters area kaibahan ro napueong igmanghod.
Nasayuran nga 24 nga nasyun ro magapasakop sa nasambitang tournament.
