KALIBO, Aklan – Naunsyami ro masadya kunta nga bakasyon sa Boracay it kapin sa 15 dumueoong mga turista matapos nga maharang sa border patrol station sa Barangay Caticlan, Malay, Aklan.
Kasunod raya sa pagkadiskubre it lokal nga gobyerno nga may travel history sa China, Hong Kong ag Macau sa nakataliwan nga 14 diyas ro nasambitang mga bakasyunista nga ginakaeakipan it Chinese, Europeans ag Asians.
Nasikyar it nakataeanang Anti-Novel Coronavirus Task Force ro tagsa-tagsa nandang pasaporte.
Suno kay Anti-N-Cov Task Force spokesperson Madel Joy Tayco, nakasueod ro mga raya sa Pilipinas antes pa man ginpatuman ro temporaryong travel ban kon sa siin nagpadueong anay sanda sa ibang tourist destinations antes sa Aklan agud magpamasyar kunta sa Boracay.
Ginklaro man ni Tayco nga uwa nanda nakitaan it sintomas it 2019 novel coronavirus acute respiratory disease ro mga dumueoong rason nga gintaw-an nanda ro mga raya it medical clearance matapos nga ginpaidaeom sa check-up it doctors.
Samtang, kapin sa 108 Chinese tourist eon lang ro nabilin sa isla nga ginakabig nga persons under monitoring ukon ro mga indibidwal nga uwa it sintomas it novel coronavirus apang may “history of travel” sa mainland China.
