Kalibo Aklan ——Nagsaka eon sa 15 eon ro namatay nga ginakaeakipan it pitong mga soldado, sangka pulis ag an-om nga mga sibilyan sa magkasunod nga mabaskog nga pagsabog sa Jolo, Sulu.
Nagaabot eon man sa 75 ro naninahan nga ginakaeakipan it 21 mga soldado ag an-om nga mga pulis.
Maeapit eamang sigon sa lugar sa gin-eontaran it explosion ro pilang mga grocery stores nga natyempuhang nagapamakae ro mga tawo.
Suno kay Capt. Rex Payot, spokesperson it 11th Infantry Division, Philippine Army, nagpatigayon it andang routine patrol ag nagabulig sa COVID-19 response ro mga soldado kat matabo ro pagsabog.
Ginbutang eon man ni Mayor Kerkhar Tan sa total lockdown ro bilog nga Metro Jolo kadungan it pagkordon sa lugar agud padayon nga usisaon kon may una pang peligro sa mga pumueoyo ag otoridad.
