KALIBO, Aklan—Makapaeanindog baeahibo ro suporta nga ginpakita it mga Pilipino sa mga atleta nga nagasabak sa nagapadayun nga 30th Southeast Asian Games ukon SEA Games 2019.
Raya ro ginpahayag sa Bombo Radyo ni Mrs. Dionesa Cezar Padios it Brgy. Old Buswang Kalibo, Aklan matapos ro ginpakita nga suporta sa pag-perform it anang unga nga si Mary Francine Padios sa pencak silat event sa Subic Bay Exhibition and Convention Center ag nakabo-oe it silver medal.
Aminado man si Mrs. Padios nga kabado ro anang unga sa pagsabak sa SEA Games bangud nga ko Nobyembre 28 eamang imaw gin-inform it pencak silat organization bilang kabueos it sambilog pang Aklanon pencak silat athlete nga si Cherry Mae Regalado nga napas-eawan nga makapasakop sa hampang bangud sa knee injury.
Proud sigon imaw sa anang unga bangud sa edad nga 16 ag raya ro kauna-unahan nga pagpasakop sa pinakamataas nga international competition hay nakabo-oe eagi raya it medalya.
Pareho sigon sanda nga emosyunal kat masayuran ro resulta it hampang bangud nga puro beterana ro anang kontra ag imaw ro pinakabata ag pinakabag-o sa tanan nga mga player nga nagpasakop sa event.
Si Francine hay grade 10 student sa Wadeford School.
Ro ginahimo sigon kara nga preparasyon hay para eat-a kunta sa West Visayas Regional Athletic Association ukon WVRAA Meet 2020.
