KALIBO, Aklan—Matapos nga pormal nga ipakilaea it lokal nga gobyerno it kalibo, nag-courtesy call ro 16 nga mga beauty contestants it Miss Kalibo Ati-atihan 2021 kay Kalibo Mayor Emerson Lachica.
Nag-agto sa taeatapan it alkalde makaron nga adlaw it Biyernes, Disyembre 18 ro tanan nga mga kandidata para makipagkita kana.
Ro mga kandidata hay ginaeakipan ni Aubrey Melanio it andagao; Gretzel Sevilla it bakhaw norte; Melody Rencio it bakhaw Sur; Maniecel Jagonob it Briones; Hannah Taladtad it Caano; Clarynce Concepcion it Estancia; Kristalyn Queda it Linabuan Norte; Vanessa Patricio it Mabilo; Geniely Antonio it Mobo ; Justinne Rafols it Nalook; Ina Pendon it New Buswang; Francine Padios it Old Buswang; Halmeiah Lim it Poblacion; Cherry Regalado it Pook; Nhesie Daza it Tigayon ag Gillian Bartolome it Tinigaw.
Nasayuran nga ro LGU kalibo makaron ro magapanguna sa mga pagapatigayunon nga events it Kalibo Ati-Atihan Festival 2021.
Sa pihak it ginapangatubang nga pandemya tuga it COVID-19, igapatigayon ro pilang mga alternative events para sa dag-unan nga kahiwatan nga makasabat sa health protocols agud nga mapadayun sa gihapon ro selebrasyon it mga Kalibonhon.
Ro “Miss Kalibo Ati-Atihan 2021” hay magiging virtual competition nga maga representar sa mga kandidata sa nagkaeain-eain nga segments it pageant nga kun sa siin ro sin-o man nga makasueod sa top 3 hay may gintaeana nga pondo para sa Advocacy Project.
Bangud kara hay mataw-an it kahigayunan ro kada Barangay it Kalibo nga ma-promote pinaagi sa pagsuporta sa andang mga kandidata.
Ro Major Prize it Top 3 nga nagdaog nga kandidata hay Project Development Fund nga igatau sa andang barangay.
Ro grand prize hay nagabalor it tunga sa milyong piso nga proyekto; 1st runner up hay 300,000 pesos ag ro 2nd runner up 200,000 pesos.
Ro virtual edition it Miss Kalibo Ati-Atihan, hay sa Enero 15, 2021.
