KALIBO, Aklan–Blangko pa ro pamilya it sangka 17-anyos nga binatlyo matapos nga magbigti-patay kainang agahon sa andang baeay sa bahin it XIX Martyrs Street, Brgy. Poblacion, Kalibo.
Suno sa magueang it biktima nga si Louie Pedrola nga aga-aga eon kat mag-abot kaina ro anang manghod kung siin haeos patapos eon sanda it inom.
Ginsumbilan pa sigon nanda raya it inom ag nakaabot pa imaw it pitong shot antes nana gin-aywan para magpahuway.
Ginsita pa sigon imaw it anang tiyo matapos nga makit-an nga nagakinulikot it wiring it computer nga suno kana hay pagagamiton nana sa laptop.
Samtang, owa man sigon kanda it gin-istorya ro biktima bangud owa raya masyadong nagapakigbahin it anang problema.
Rason nga nakibot eon lang sigon sanda kaina matapos mapan-uhan it sambilog pa nandang igmanghod nga nakabitay eon ro biktima.
Sa pihak nga parte, eubos nga kasubo man ro nabatygan it andang ina nga si Jeanette Pedrola matapos ro pag-utas sa kaugalingon nga kabuhi it anang unga.//Nagpangayo pa sigon raya it kwarta kana kahapon apang owa imaw it gintao.
Nasayuran nga masami nga idtu nagatinir sa Brgy. Caticlan, Malay ro biktima matapos nga magbueag ro anang mga ginikanan.
Ginpahayag dugang nga waeong dag-on pa eamang ro biktima kat ginbuoe raya it anang ama para daehon sa Isabela.
Sa makaron hay padayun pang gina-imbestigahan it Kalibo Municipal Police Station ro insidente.
Samtang kung may problema ka ag gusto mo it kaistorya, puwedi kang magtawag sa: National Center for Mental Health Crisis Hotline (NCMH-USAP) sa 0917-899-USAP (8727) ukon sa 7-989-USAP (8727).
Puwedi man nga magtawag sa Hopeline PH 24/7 hotlines: 0917-558-4673 (Globe), 0918-873-4673 (Smart), 2919 (toll-free for Globe and TM).
